सुर्खेतमा मानव अधिकार उलंघन घट्दो

 सुर्खेत, भदौ ।
पछिल्ला छ महिनामा सुर्खेत जिल्लामा मानव अधिकार उलङ्घनका घटनामा कमी आएको छ । 
मानव अधिकारका क्षेत्रमा काम गर्दै आएको इन्सेकले वीरेन्द्रनगरमा प्रस्तुत गरेको अर्धबार्षिक रिपोर्ट अनुसार गत पुस देखि असार महिना सम्ममा १ सय ९ वटा मानव अधिकार उलङ्घनका घटना घटेकाछन् । गम्भिर प्रकृतिका मानव अधिकार उलङघनका घटनामा कमि आएपनि महिला हिंसा लगाएतका घटनाहरुमा भने कमि आएको छैन् । ती घटनाहरु मध्ये सबै भन्दा बढी महिला हिंसाका ७० वटा घटना घटेकाछन् ।  बाँकी ३९ वटा घटनाहरु भने राजनीतिक दल र राज्यबाट घटेका घटनाहरु रहेका छन् । मानव अधिकार उलङघनका घटनाहरु घटाउने राजनीतिकदलरुमा नेकपा–माओवादी सबै भन्दा पहिलो नंम्बरमा छ । नेकपा –माओवादीबाट १० वटा मानव अधिकार उलङ्घनका घटनाहरु घटाइएको रिपोर्टमा उल्लेख गरिएको छ । राज्यबाट पक्षबाट धम्कि र कुटपिटका ८, माओवादी समर्थीत भातृसंगठनबाट कुट पिट तथा धम्कि १, नेपाली कांग्रेसबाट कुटपिट १, नेपाली कांग्रेस समर्थीत विद्यार्थी संगठन नेवि संघबाट कुट पिट १, एकिकृत नेकपा माओवादीबाट कुटपिट १ र अज्ञात समूहबाट कुटपिटका १ वटा घटना  घटाइएको इन्सेकका सुर्खेत जिल्ला प्रतिनिधि दुर्गा थापाले जानकारी दिए । प्रतिनिधि थापाका अनुसार महिलामाथि हुने बलात्कार, बेचविखन, यातना लगाएतका घटना गरी गम्भिर प्रकृतिका ९ घटना घटाइएका छन् । त्यस्तै पछिल्लो छ महिनाको अवधिमा अभिव्यक्ति स्वतन्त्रता सम्बन्धीका १ वटा घटना घटेको थापाले जानकारी दिए । गम्भिर प्रकृतिका घटनाहरुमा कमि आएको बताउँदै थापाले समिक्षामा अघिल्लो बर्षको तुलनामा करिब आधा कम घटना घटेको बताए । यसरी घटनाहरु कमि हुनुमा मानव अधिकारका उलङ्घनमा सुधार आएको देखिए पनि महिला माथि हुने घरेलु हिंसामा भने कमि हुन नसकेको थापाको भनाई छ । नेपाल मानव अधिकार संगठनका अध्यक्ष गोविन्द सुवेदीले इन्सेकले मानव अधिकारको क्षेत्रमा महत्वपूर्ण काम गर्दै आएको भएपनि विकट गाउँहरुमा मानव अधिकार विरुद्ध भएका घटनाहरुलाई समेट्न नसकेको बताए । प्रस्तुत रिपोर्ट अनुसार मानव अधिकारको स्थिति सुधार उन्मुख देखिनुले देश शान्ति स्थापना तिर गैरहेको संकेत हुने उनको भनाई थियो । नेकपा एमालेका हरि अधिकारीले दल र मानव अधिकार उलङघन हुनुमा कसैले पनि उत्तर दायित्व नलिनुले सोचेअनुसार कमि आउन नसकेको बताए । मानव अधिकारलाई जन्मजातका रुपमा परिभाषित गर्दै बर्गिय रुपमा मानव अधिकारलाई बुझेमा गलत हुने भनाई व्यक्त गरे । अपराध भागबण्डा गर्ने  चिज नभबताउँदै अपराध गर्ने कुरामा पतिस्पर्धा गर्न नहुने उनको भनाई थियो । नेकपा–माओवादीका  सेक्रेटरी प्रशान्त आर.सीले इन्सेकले गाउँ ठाउँमा भएका घटनाहरु समेट्न नसकेको बताए । घटनाहरुको निष्पिक्ष रुपमा रिपोर्टिङ गर्नुका साथै सदरमुकाममा भएका घटनालाई मात्रै रिपोर्टमा समेट्नु भन्दा पनि सबै घटना समेट्न आवश्यक रहेको बताए । जिल्लामा मानव अधिकारका क्षेत्रमा काम गर्दै आएका अन्य संघ संस्थाहरुका अनुसार महिला हिंसाका घटनाहरु पछिल्लो समय सम्बन्धीत निकाय सम्म आउन थालेका छन् । घटनामा बृद्धि नभएको र बाहिर आउने कुरामा बृद्धि भएको महिलाका क्षेत्रमा काम गर्ने आवाज लगाएतका संस्थाहरुको भनाई छ ।