‘तुफान’को विशेष प्रदर्शनी हुने

गोविन्द खत्री
सुर्खेत, फागुन ।
निर्माण सम्पन्न भइ सञ्चालनको लाइनमा रहेको चलचित्र ‘तुफान’ को सुर्खेतमा बिशेष प्रदर्शनी हुने भएको छ ।
आउँदो चैत महिनाको पहिलो शनिबार ७ गते चलचित्र तुफानको विशेष प्रदर्शनी हुने भएको हो । चलचित्र निर्माता यूनिटले वीरेन्द्रनगरमा पत्रकार सम्मेलनको आयोजनागरी बिशेष सो गर्न लागिएको बारे जानकारी दिएको हो । सुर्खेती सञ्चारकर्मी समेत रहेका निर्माता रमेशकुमार पाण्डेले चलचित्रको व्यापार भन्दा पनि प्रचार प्रसारका लागि विशेष सो गर्न लागिएको बताए । चलचित्रका बारेमा जानकारी दिँदै कार्यकारी निर्माता सुर्खेती युवा व्यवासयी कमल खड्का ‘जुनी’ले चलचित्र आउँदो बैशाखमा नयाँ बर्षको अवसर पारेर देशभरिका हलहरुबाट एकैसाथ प्रशारण गरिने बताए । उत्कृष्ट चलचित्र भएको दाबि गर्दै दर्शकहरुले मनपराइदिएर चलचित्रले राम्रै व्यापार गर्ने आशा लिएको उनले बताएका छन् । बासुदेव पोख्रेलले निर्देशन गरेका छन् भने चलचित्र कलाकारहरु राजेश ढुङ्गाना, सन्तोष केसी र कल्पना शाहीको मुख्य भूमका रहेको छ । मामा भान्जाको पट कथा रहेको उक्त चलचित्रमा, हरि उदासीको संगीत रहेको छ । रोशन श्रेष्ठले द्वन्द्व र सुनिल गिरीले नृत्य निर्देशन गरेका छन् । सुमन तन्डुकारले छायांकन गरेका छन् भने प्रज्वलित पराजुलीले चलचित्रको सम्पादन गरेका हुन् । चलचित्रको मुख्य सहायक निर्देशक जनार्दन चालिसे रहेका छन् । चलचित्रमा केशव  तामाङको पनि लगानी रहेको बताइएको छ । यसै चलचित्रबाट डेब्यु गरेकी सुर्खेतकै नायिकका शाहीले अन्य चलचित्रमा समेत अवसर प्राप्त गरेकी छन् ।
चलचित्र निर्माणमा ३५ लाख खर्च भएको र अब प्रचार प्रसारमा १० लाख जति खर्च हुने अनुमान रहेको निर्माता यूनिटले जनाएको छ ।