विद्यालयका शिविर छोड्दै विस्थापितहरु

सुर्खेत, १४ भदौ ।
जिल्लाका विभिन्न विद्यालयहरुमा शिविरमा राखिएका विस्थापितहरुलाई अन्यत्र सार्ने काम शुरु भएको छ ।
गत साउन अन्तिम साता आएको बाढी पहिरोबाट विस्थापित भएकाहरुलाई राखिएका ५७ शिविर मध्ये १८ वटा शिविर विद्यालयमा छन् । मावि कृष्णकञ्जमा बसेका विस्थापितहरुले बिहीबार नै शिविर छोडेपछि अब भने १७ विद्यालयहरुमा शिविर छन् । अन्य विद्यालयबाट पनि व्यवस्थापनका लागि अन्त सार्ने तयारी गरिएको छ ।
विस्थापितहरुलाई विद्यालयमा राख्दा ती विद्यालयको पठन–पाठन प्रभावित बनेपछि विस्थापितहरुलाई अन्त सार्न शिक्षा कार्यालय तथा सरोकारवालाहरुले आग्रह गरेका थिए । दुई सातासम्म विद्यालयमा शिविर राख्दा करिब ८ हजार विद्यार्थीको पढाइ प्रभावित भएको जिल्ला शिक्षा कार्यालयको भनाइ छ । घर मात्रै भत्किएर जमिन बाँकी रहेकाहरुलाई आफ्नै जग्गामा पाल हालेर वस्न समितिले पहल गरेको छ । विद्यालयबाट शिविर सारी तत्कालका लागि व्यवस्थापनका लािग लागि बनाइएको उपसमितिले पहल शुरु गरेपनि इत्राम र खोर्केखोलाबाट विस्थापित भएकाहरुले भने सहज रुपमा शिविर छोड्न नमानेको समितिका संयोजक वस्नेतले बताए । पाल हालेर बस्नका लागि कुनै निश्चित ठाउँ हुनुपर्ने उनीहरुको भनाई छ । 
साउनको अन्तिम साता आएको बाढी पहिरोले जिल्लाका विभिन्न ठाउँमा गरी ४ हजार ५ सय ७२ घरमा क्षति पुगेको जिल्ला प्रशासनको तथ्याङ्क छ । कार्यालयका अनुसार ३ हजार १ घर पूर्ण रुपमा क्षतिग्रत बनेका छन् भने १ हजार ५ सय ८१ घरमा आंशिक रुपमा क्षति  पुगेको छ । बाढीबाट घरबास गुमाएका ६ हजार ५ सय ७७ मानिस विस्थापित भएर विभिन्न ठाउँमा आश्रय लिइरहेको छन् भने ३४ जनाको मृत्यु भएको छ भने ९१ जना वेपत्ता भएका छन्, २६ जना घाइते भएको जनाइएको छ । वीरेन्द्रनगर भित्र भएको क्षतिको भने पूर्ण विवरण आएको सहायक प्रजिअ जगतबहादुर वस्नेतले बताए । नगरभित्र ३ सय ९० घरमा पूर्ण तथा १ सय ८८ घरमा आंशिक क्षति भएको उनले जानकारी दिए ।
विस्थापितहरुलाई विभिन्न निकाय मार्फत दोस्रा चरणको राहत स्वरुप करिब १४ दिनलाई पुग्ने खाध्यान तथा गैरखाद्य वस्तु त्रिपाल, भाँडा, कपडा लगायत वितरण गरिएको उनले बताए । बिहीबारसम्म ४४ हजार ८ सय ६० किलो, दाल १ हजार ३ सय ३३ किलो, १ हजार ४ सय ६८ किलो सोयाबडी, १ हजार ६ सय ७५ किलो नुन, १ हजार ५ सय  २१ पेटि तेल, ३ सय ७६ कार्टुन चाउचाउ, २ सय ६० कार्टुन  विस्कुट,  २३ प्याकेट औषधी, एक सय किलो आलु  र १ सय ७२ पोका दालमोट वितरण गरिएको जिल्ला प्रशासन कार्यालयले जनाएको छ । 
फोटो क्याप्सन ः इमान्यूल बोर्डिङ स्कूलमा त्रिपाल टांगेर बसेका विस्थापितहरु ।

जिल्ला दैवि प्रकोप उद्धार समितिले सहायक प्रमुख जिल्ला अधिकारी जगतबहादुर वस्नेतको संयोजकत्वमा उपसमिति गठन गरी विद्यालयबाट शिविर सार्न जिम्मा दिएको छ । बुधबार गठन गरिएको समितिले उपत्यकाका विद्यालयहरुमा राखिएका सबै शिविरहरुमा पुगी अन्त सार्ने काम शुरु गरेको समितिका संयोजक जगतबहादुर वस्नेतले बताए । विद्यालयहरुमा बसेका विस्थापितहरुलाई अन्त स्तानान्तर गर्न उपत्यकामा मुख्यगरी सुब्बाकुना स्थित सडक डिभिजनको भवन, महिला प्रशिक्षण केन्द्र, कालागाउँ क्षेत्रीय अस्पताल नजिकको खुल्ला चहुर लगायतका ठाउँमा विस्थापितहरुलाई स्तानान्तर गर्नका लागि पहल शुरु भएको वस्नेतले  जानकारी दिए । उनले शनिबारसम्ममा अन्य विद्यालयमा भएका शिविरहरुलाई पनि सार्नका लागि पहल गरिने बताए  ।